「日做夜做，身體緊要！」——呢句說話，每一位紮鐵、搭棚、釘板嘅工友師傅都聽過，但又有幾多人真係放喺心上面？每日喺地盤流汗拼搏，為嘅係屋企人生活過得好啲；但如果忽略咗自己嘅身體，賺到幾多都冇用。尤其係我哋建造業工友，長期暴露喺沙塵環境之中，肺部健康不知不覺受到威脅——矽肺病（肺塵埃沉着病）就係我哋行業嘅「隱形殺手」。
唔使擔心！「肺塵埃沉着病醫學監測計劃」幫你守住健康！
上幾次同大家提過嘅「醫學監測計劃」，其實係專為建造業工友度身訂造嘅免費身體檢查服務。簡單嚟講，就係每3年一次，幫你照吓肺、check吓呼吸功能，及早發現有冇矽肺病嘅跡象。病向淺中醫，早知道、早處理，先可以繼續安心開工！
咩人合資格？
- 年滿35歲；
- 從事建造業工作至少1年；
- 持有工人註冊證，或者由工會/僱主證明身份。
費用？
完全免費！ 驗完身，仲有$100超市現金券（一次性）作為小小鼓勵。
如果你超過50歲，仲可以額外獲得免費大腸癌篩檢服務（唔係即時照腸鏡，而係簡單嘅檢查先）。
健康無價，檢查免費！為咗自己，為咗屋企人，快啲登記參加計劃，畀自己一個安心！
#肺塵埃沉着病 #及早預防 #香港建造業總工會 #香港工人健康中心 #肺塵埃沉着病補償基金委員會 #肺塵埃沉着病醫學監測計劃 #胸肺X光檢查
外部連結
預防矽肺病第一步：揀岩口罩好重要！
❌ 外科口罩冇用！好多工友都搞錯
過去三年疫情，令好多工友習慣咗戴外科口罩開工，以為有戴就安全。大錯特錯！
外科口罩嘅設計係用嚟阻隔飛沫、細菌，但對於建築地盤常見嘅微細矽塵，根本阻擋唔到！長期吸入矽塵，就會慢慢損害肺部，最終引致無法逆轉嘅矽肺病（肺塵埃沉着病）。
✅ 預防矽肺病，要戴呢種口罩
要有效預防矽肺病，工友必須記住三個重點：正確選擇、正確配戴、正確保養
【正確選擇】
- N95口罩：過濾效率達95%以上，有效阻隔微細粉塵
- 俗稱「豬咀」嘅防護面罩：配備高效能濾棉，適合長時間喺高粉塵環境工作
【正確配戴】
- 佩戴口罩前，必須做正壓測試（呼氣檢查有冇漏氣）
- 再做負壓測試（吸氣檢查口罩是否緊貼面部）
- 確保口罩邊緣完全密封，唔好留有罅隙
【正確保養】
- 定期更換濾棉，唔好等到呼吸困難先換
- 存放喺清潔乾燥地方，避免潮濕影響過濾效能
- 發現口罩破損或變形，立即更換
👨🏭 溫馨提示：戴口罩 + 定期驗身 = 雙重保障
就算戴岩口罩，都唔代表100%安全。建造業工友應該每3年做一次身體檢查，包括：
胸肺X光檢查
肺功能測試
咁就可以及早知道肺部有冇受損，病向淺中醫！